西元2005年05月18日
一個人的雙人床
雙人床是圖騰！
搬家想一切從簡，包租婆的朋友有張用過兩個月的單人床架想廉讓，好想幫襯，最大好處是床已在島上某間屋內，近便，其二是中屋搬細屋，床小點，地方見用。
一眾豬狗(豬朋狗友之簡稱)大表反對，認為我應該用雙人床，而且還要是自己睡開那張，甲豪氣干雲﹕「大張唔怕，拆得啫，我哋幫你搬入嚟。」乙好似批命師傅﹕「你瞓單人床邊有運行！」丙似盲公陳﹕「你點知上一手瞓過的人帶啲乜氣過你？！」甲乙是單身，丙己婚，有固定女朋友的丁說﹕「雖然我唔係單身，我都覺得你咁唔得。」，
原來一張床有好多文章﹕一眾單身男子每晚都睡雙人床，希望好快有「人」出現，與自己共用這床。 「實際啲講，如果有人出現，床要單變雙，咁就煩，不如整定雙人床啦。」一位豬狗說。此話甚善。甲乙丙丁說萬一有需要一晚半晚，雙人床就派用場，好過擠在單人床上殺風景。床變成地主門神或者驅風油，可以看門口，又可以承載黎民的卑微願望，有個寄託。
上周六遇島上新相識，問這位獨居男子睡甚麼床？他答雙人，緊接一個古怪的微笑。點解？對方的微笑凝住一秒，然後說「我鍾意轆來轆去。」好嘢，呢球俾佢救到。
然後我在串門子的時候，發現單身女郎也是用雙人床......
床如果要來睡的話，人的一生有三份一時間用到，如果加進用來做愛、看書、寫東西、吃東西、看碟、攤抖唔知做乜又唔係瞓嗰隻，床，隨時變成半生用品。既然床如此 multi-functional，大好過細，雙人好過單人。
00:35 永久網址 | Email this
留言
所以我想般出來, 如果能力許可。因為我想要一張多功能雙人床, 就是如此簡單。現同家人住, 我的房間是可以放一張雙人床的。但, 有一回和阿爸媽去宜家睇傢私, 我看中一張雙人房, 想落單。阿爸媽異口同聲說: 你一個人睡, 唔洗咁大張!
發表人: learnedfriend | 西元2005年05月18日
無論單雙，都祝你晚晚做美夢
發表人: percy | 西元2005年05月18日
大家咁話, 不過, 現在我最需要一個好枕頭, 這個睡得我頸痛!
發表人: learnedfriend | 西元2005年05月18日
我果張雖然係雙人床，但兩個人用，其實就係每人兩尺，仲逼過一張兩尺半的單人床。無論單身巳婚，我都支持人用雙人床，越大越好，最衰我屋企細。回想未嫁時舊房可放三尺幾四尺既碌架床，一個人瞓上格，睡前睇睇書，累了，書放床邊，抱住大攬枕，向左側，向右轉，十分舒服。
奉勸單人床一族，點都要試試雙人床。
另外，好枕頭不如轉用矮枕頭（但也注意要有承托力），推拿師建議的。
發表人: 佐敦舊街坊 | 西元2005年05月18日
舊街坊﹕
完全同意你之體驗，如果兩個人骨架大，其中一個膊頭好橫，同睡四呎床簡直是夢魘；到冬天的時候，加上厚厚棉被，就更加逼到阿媽都唔認得。
有次在宜家見到五呎至五呎半闊雙人床，覺得這店user-friendly得很。不是幫它賣告白，他們的雙人床長度也照顧周到，一般雙人床四乘六，他們是六呎半，吾友說是鬼佬徙屎，其實我覺得不是為鬼佬度身，中國人也需要如此長。我個人「體」驗是﹕雖然我不高，但加上大枕頭，而大枕頭又不想頂住床頭的話，床要長過六呎。傳統的四乘六，試過冬天蓋被，被腳跌出床尾.......
發表人: percy | 西元2005年05月18日
learnedfriend:
試過吾友的零壓枕，驚為天「枕」，一問價錢，嚇親，六百元兩個，後來見有家店賣四百元兩個，還是肉痛，再後來是姐姐送我一個，樂於使用！！
發表人: percy | 西元2005年05月18日
龍床不及狗竇--
我同各位的論調完全相反。我由出世起家住公屋28年，習慣左一張好夢的碌架床上格，硬床褥，硬枕頭。每每出埠公幹，都不習慣大酒店的龍床，常懷念狗竇。到現在搬到居屋3年有多，雖擁有自己的床和房間，但始終不是十分習慣。可見我一副賤骨頭。
發表人: ikusei | 西元2005年05月19日