島居博思

晨早已知Madredeus 12月1日去澳門演唱，只演一場，機會難逢，好想好想在自己做肥爛屎的雜誌寫個詳盡介紹。終於按捺不住，用自己的錢打去澳門文化中心(一直做長途電話訪問無論美國北京新加坡之類都無得claim通話費)，叮叮叮登，等了幾分鐘，燒了一陣銀紙，終於轉駁至對口節目策劃人，講了一大堆請求，想做訪問，對方居然第一時間傳給我許多大相(澳門朋友作息節奏悠閒，好少可咁快反應)，現在正努力幫忙約訪問中，感動。忽接編輯一句來自上方的提醒﹕「唔好做埋晒d冷門野。」剛做了電音創作人專訪，因此「出事」，原來有政府大力撐場兼大落廣告的重頭節目也難逃批評。Madredeus出街的話，不捱批的機會肯定是0！

唱的是葡文，六位成員青春不再，女主音不是天香國色，場地在澳門，中文譯名是聖母樂隊，令人想起唱聖詩，加上主管唔識佢，出到街的機會凍過水。如果我用他們唱Wim Wenders里斯本物語插曲做開頭，死多二錢重，用少眾襯托少眾，難成「氣候」。諗、諗、諗，想起幾米首張個人愛好專輯就收錄了Madredeus兩首歌，或者有D效。不過幾米的專輯出版於5年前，搵番都難，提起都好似好舊。

筆耕之際，與人笑稱剛訪問了古天樂和湯鎮業(其實是古天農和湯駿業)，對方說如果真的訪問到他們一切好辦！對了，一直唔化的我竟忘了名人靚人效應幾時都係本地報章雜誌的殺手鐧。有了名人介紹，唔識唔聽唔睇好似好執輸咁，幾冷門都有機會成為揀手貨。有無人知道邊位名人鍾意聽佢地？唔該單聲！最好當時得令d啦，名人都有in與out，唔該，唔該，我真係好想推介佢地。